Алматы қаласындағы Төле Би көшесінің бойында орналасқан «ШашлыкOFF» кафесінде бір топ ер адам 18 жастағы жігітті аяусыз соққыға жықты.
Оқиға қазан айының 11-не қараған түні болды. Анасының айтуынша, оның баласын 35–40 жастағы 15–20 мас ер адам соққыға жыққан. Алғашқы соққыдан кейін ол есінен танып қалған.
Ал қазір полиция тек 3 күдіктіні ғана ұстаған.
«18 жастағы жігітті 35-40 жасқа толған атпалдай еркектер жабылып ұрып, құлатты. «Есімді жисам, басымнан кезек-кезек тепкілеп жатыр» дейді. Алмалы аудандық ішкі істер бөлімі менің естуімше 3 адамды ғана ұстаған. Оларды тек жеңіл бап бойынша ұстап отыр. Ал басты күдікті машинаға отырып, оқиға орнынан ізін суытқан. Бұлай қалып кетпей, әркім өзіне тиісті жазасын алса екен», – деді қайғыдан қан жұтқан анасы.
Алмалы аудандық полиция басқармасы қасақана денсаулыққа зиян келтіру дерегі бойынша қылмыстық іс қозғады.
«Жедел-іздестіру шараларының нәтижесінде оқиғаға қатысы бар барлық адамдар анықталып, ұсталды. Қазір олардың әрқайсысының кінә дәрежесін және оқиғаның шынайы жай-жапсарын анықтауға бағытталған тергеу амалдарының кешені жүргізіліп жатыр. Әр қатысушының әрекетіне қағидатты құқықтық баға беріледі. Істің тергелу барысы Алматы қалалық полиция департаменті басшылығының ерекше бақылауында», — деп мәлімдеді Алматы қалалық полиция департаментінің баспасөз қызметі.
Post Comment